أول مرة أكتب فيها عن فيلم عربي عشان تقريباً دا أول فيلم عربي اشوفه و يعجبني من فترة طويلة جداً -ماعدا "فبراير الأسود" تقريباً- لخالد صالح برضه ، المهم،
الفيلم فيه نفس أبطال الجزء الأول : السقا، و هند صبري، و خالد الصاوي، و ضياء الشافعي، + ناس جديدة زي : خالد صالح و أحمد مالك و أروي و ميار الغيطي .
بالنسبة للبوستر انا فقدت الأمل اني اشوف بوستر عربي حلو، مجرد لوحة كبيرة بيحطوا عليها أكبر قدر من الممثلين عشان محدش منهم يزعل و عشان يجيبوا زباين أكتر، لكن هي عموماً بتبقي زي الزفت و شغل "نقّاشين" كدة !
ندخل ف الفيلم نفسه:
أولاً انا عن نفسي مكنتش شايف أي مبرر لوجود جزء تاني، القصة مش محتاجة خالص لكن تقريباً هم حبّوا يستغلوا نجاحه ف انهم يعملوا جزء تاني - وتالت غالباً كمان- بس دا مايمنعش ان الفيلم كويس جداً و في نواحي كتير -بعيداً عن القصة- بيكون احسن من الجزء الأول كمان.
والفيلم كمان مايل لكونه فيلم سياسي أكتر من كونه فيلم اكشن، تحس كدة انه انتاج "هيئة الشؤون المعنوية" او ع الأقل مشاركة ف ال25 مليون اللي متكلفها الفيلم، بس انا ماتضايقتش من الرسالة اللي فيه اللي مكنتش مقتنع بحاجات فيها -خصوصاً بالنسبة للثورة و كدة-، مش لازم يعني اشوف فيلم يعبر عن رأيي! امال هم عملوا السينيما ليه؟
طبعاً فيه "عك" كتير بالنسبة للسنين و الأعمار،خصوصاً عند هند صبري و السقا و ابنه، لو حسبتها هتلاقي تقريباً كله غلط بس انا حاولت اتجاهل دا شوية عشان اركز ف الأحداث و خلاص .
بالنسبة بقي للموسيقي التصويرية، من اكتر الحاجات اللي زعلتني، المفروض انها من العظيم "عمر خيرت"، بس انا تقريباً ماسمعتش أي حاجة منها! و مش هتفتكر منها نوتة واحدة!
حتي المشهد اللي المفروض ناس فيه كانت بتغدر بيهم و الموسيقي بدأت تعلي شوية و قلت هيطفي الصوت بقي و نعيط ع الموسيقيـ الاقيه معلّي صوت الضرب! و ماسمعتش انت اي حاجة من الموسيقي، اكتر حاجة ضايقتني فعلاً ف الفيلم :/
أما بالنسبة للمؤثرات البصرية و الانفجارات، هي كانت نسبياً حلوة جداً، -بعيداً عن آخر مشهد اللي عك كل حاجة لما حب يعمل فيها بتاع و صوّر جوّا الانفجار و احرج نفسه !- نقدر نقول يعني اننا دخلنا مؤثرات القرن ال21، يعني نعرف نقارن نفسنا بهوليوود كدة بتاعة 2000-2001 ، مش وحش والله احسن من مفيش . خصوصاً مشهد "اقتحام السجون" كان متنفذ حلو جداً .
بس برضه "شريف عرفة" عنده أكتر من كدة بكتير !
ندخل عالممثلين و أدوارهم بقي:
-أحسن أداء بالنسبالي كان "هند صبري"، نضجت شكل مش طبيعي، و كانت مالية دور "الكبيرة" جدأ من أول الشكل و اللبس لحد الأداء نفسه، مشاهدها تحديداً اللي بتكون مع "منصور" بتعملها بحرفية قوي، خصوصاً لما بتبين انها قوي و هي في أشد حالاتها انكساراً .
-"السقا" نفسه تمثيله اتحسّن جداً جداً عن قبل كدة و بقي راسي كدة، اللي مخدموش خالص ان الفيلم برضه تحسه متفصلّه، حتي مع ان دا جزء تاني، بس المفروض ماكانش يبقي متمحور عليه قوي بشكل ممل كدة.
-طبعاً "خالد الصاوي" كان عظيم في دوره -كالعادة- خصوصاً في تطوره عبر الفيلم -مع شوية كوميديا خفيفة حلوة منه- بتتعاطف معاه كتير و بتتقلب شخصيته خالص علي مدار الفيلم بشكل سلس و حلو .
-اللي مش قادر افهمه ليه "محمود عبدالمغني" دوره اختفي؟ كنت متوقع انه يكون له دور قوي ف الجزء دا و انه يعكس الأدوار مع "خالد الصاوي" و خصوصاً لحظات تطوره ! دي حاجة مبهمة محدش جاب سيرتها مع انه علي ما أتذكر كان قريب "خالد الصاوي" في الفيلم.
-ندخل بقي علي "خالص صالح"، الدور تقريباً مفيهوش غلطة، تحس انهم جابوا كاتب مخصوص للدور دا، و تمثيل خالد صالح كان أكتر من عظيم - و إن كنت مصّر ان "محمود عبدالعزيز" كان هيعمله احلي زي ماعمله في "باب الخلق- بس فعلاً علامه في تاريخه -اللي انتهي للأسف :/ -
-و "ضياء الشافعي" عمل أهم دور له بالنسبالي، مع انه طالع "أخرس" بس تقريباً أول مرة يمثّل بعنيه كدا!
مشاهد الدراما قوي و الكوميديا عملهم علي نفس المستوي و كانوا احسن من بعض.
- أما بالنسبة ل"أروي"، انا عادة بحبها جداً عشان بحسها محتلفة، لكن هنا مكنتش مرتاح لاختيارها خالص، حتي لو عاملة "دكتورة و متعلمة" بس لهجتها وحشة برضه و أداءها ضعيف خصوصاً عشان بتُقارَن ب"هند صبري" و كمان واضح ان الجزء التالت هيكون صراع بين الاتنين، ف اتمني تتحسن عن كدة!
-آخر ناس معانا هم الشباب... أحمد مالك و ميار الغيطي ، تمثيلهم كان تقريباً احسن من الكبار كمان و صعود قوي جداً للاتنين .
إجمالاً الفيلم حلو، الحبكة و القصة مش قوي و ناقصهم حاجات كتير، بس الفيلم -حتي لو طويل- لحدِ ما ممتع و اكيد و دا الأهم احسن من اي فيلم عربي تاني ممكن تدخله الكام سنة دول :)
0 comments:
Post a Comment