3 أيام في السجل المدني !

بما اني بحضّر ورق الجيش -الإجباري- و كان عندي كام مشكلة ف الورق ...
اضطرّيت اعمل بطاقة جديدة ليا ...
و بعد 3 أيام هناك عشان أطلّعها عندي بعض الملحوظات :

- ممكن اتجاوز اني عامل بطاقة "فورية" ب75 جنيه، و ماستلمتهاش غير بعد يومين !
- و كمان ال3 أيام دول كانوا مع اني المفروض واحد اعرفه ماسك المكان المفروض انه كدة "أنجزلي" !
- دا غير ان المشكلة الأكبر ان الكهربا كانت بتقطع 3 مرات ف اليوم ل3 ساعات ع الأقل !
- الناس أساساً اكتر من ان المكان دا يستوعبهم بمراحل، مابالك بقي لما النور بيقطع الواحد بيبقي قرّب يغمي عليه!
- لو هنتكلم عن مين المقصّر او مين السبب في العطلة، لازم نوضح كام حاجة;
     الناس زي ماقلت كتير جداً و المكان لايمكن يلبّي طلباتهم اللي معظمها" مستعجلة"
    الموظفين و الضباط و حتي المدير، مكاتبهم غير آدمية بمعني الكلمة . وعددهم أقل من انه يقضي مصالح كل الناس دي!
    وكمان حتي مرتباتهم اللي تعتبر قليلة و مش كفاية ان الواحد منهم مايطلبش م الناس رشوة، مابياخدوهاش كلها مرة واحدة و    بينقّطوهم بيها، قدام عيني الموضوع دا بما اني كنت طول الأيام دي ف مكتب المدير .. الكلام شامله هو شخصياً بالنسبة للمرتبات.

- ندخل بقي ع الروتين الممل: يعني ايه امضي ورقه هنا، اطلع أختمها م المبني اللي ف آخر الشارع و ارجع أمضيها ف الدور التاني؟ الختم تقيل يعني مايعرفوش يحطوا الحاجات دي جنب بعض؟؟
- يعني ايه واحد يبقي جايب عقد إيجار من 1-8  إلي 30-7 ، و يترفض يسجله عشان اللايحة بتقول لازم يكون عقد سنة كاملة و دا عقد "سنة إلا يوم" !!

كل دا ممكن أحاول أتغاضي عنه .... لكن اشوفهم شغالين بالflobby disks !
الناس دي عايشة ف عصر تاني !!!!!