زمن الرجولة العنصرية ftw !

واضح ان كل حاجة بتتآمر عليا عشان كل يوم أشوف حاجة سخيفة تعصّبني،
من شوية شفت أغنية لفرقة اسمها  "Boy Band" الأغنية اسمها : زمن الرجولة .

من الأول وانا عارف ان من العنوان هتبقي حاجة خايبة من اللي العرب فالحين فيها جو الأقرع اللي بيتباهي بشعره دا،
بس لقيتها كلمات "أمير طعيمة" فقلت مابدّهاش بقي ...

وكانت من أتفه و اسخف الحاجات اللي سمعتها ف حياتي!
الأغنية عبارة عن تريقة عن الشباب اللي بيلسوا لس مش عاجب بعض الناس -او حتي معظم الناس - التانية، سواء بنطلونات skinny او الوان حمرا او سجاير -مش فاهم ايه دخلها و كإن مثلاً اهاليهم مابتدخنش !-
و طبعاً وصفهم بإنهم "خواجات" و عيال "طرية" اللي مش قادر افهمه ازاي واحد المفروض من أحسن الشعراء في البلد السخيفة دي واللي المفروض انه نخبة النخبة يكتب كلام عنصري و تافه و سخيف زي دا !

مش فاهم اصلاً ايه موضة المزايدة اللي الناس أدمنتها دي، كل واحد عايش عشان بس يكيد في غيره و يعتدي علي حريته، في حين انه مابيعملش اي حاجة تانية ف حياته اساساً .

انا عن نفسي مابحبش اللبس دا - لا في اللبس ولا في شكل اللي قدامي-  بس كل واحد حر، محدش له انه يحكم اصلاً علي غيره !
ثم ان اصلاً لو هنتكلم من نفس كلامهم هنلاقي ان التلاتة اللي بيغنّوا دول اصلاً شكلهم عيال طرية و اي حد تاني متخلف زيهم هيقول عليهم "خواجات" بتاعتهم دي !
بعدين انا مش فاهم شوية تحس ان عندهم  fetish للشنب و الجلابية، و شوية ماتبقاش عارف هل هما كدة بيرفعوا من شأن الرجولة ولا بيقللوا منها، مهي لو الرجولة عبارة عن "زمن شنبات و جلابية" تبقي حاجة هايفة قوي قوي !
وبعدين عمالين ف الفيديو يرموا الكتب و الكورة و المكتب، مش فاهم ايه الفكرة يعني، دي حاجة ناس طرية برضه دي كمان ولا المفروض مانستخدمش غير النبّوت ولا ايه؟
و بعدين اصلاً حاجة تحزّن لما عيال صغيرة زي دي و مولودة المفروض ف العصر دا تبقي مقتنعة بإن "طري" او حتي الي آخر ماهيقولوا عليه "مثلي/او شاذ" يعتبروها شتيمة و حاجة تعاير بيها غيرك، مش مجرد شخص و طبيعة مختلفة زيها زي غيرها!
المفروض ان الأجيال الجديدة تبقي نسبة الخرا اللي ف دماغها تبقي أقل نسبياً من الأجيال المترّبة بتاعة أهالينا !

طبعاً مش هتكلم عن صوتهم -اللي المفروض انه اهم حاجة اساساً- عشان صوتهم زي الخرا ومالوش وجود ف الوجود اساساً .

الواحد مابقاش عارف مين خطر اكتر علي دماغ الناس، غنا الشعبي بتاع المخدرات، ولا غنا العيال دي اللي بتمثل انها "أنضف" !


-ملحوظة عنصرية علي طريقتهم : شكلهم بالشنبات كان أكتر أنوثة من سعاد حسني في فيلم "للرجال فقط" .... باعتبار ان مثلاً أنوثة دي شتيمة يعني !!!